Metfjöldi barna og unglinga æfir nú íþróttir. Mikilvægt er að viðhalda áhuga þeirra fram yfir unglingsaldur.
Pálmar Ragnarsson, körfuknattleiksþjálfari yngri flokka KR, segir áhugahvöt og sjálfstraust barna vera lykilatriði. Ef börnin hafa ekki áhuga á því sem þau gera þá dregur úr sjálfstrausti þeirra og auknar líkur á að þau hætti því sem þau eru að gera. Þetta á sérstaklega við um þau börn og ungmenni sem stunda íþróttir. Mikilvægt er því að viðhalda áhuga þeirra.
áhugahvöt og sjálfstraust barna er lykilatriði
Pálmar var með bráðskemmtilegt erindi um áhugahvöt og sjálfstraust barna í íþróttum á ráðstefnunni Sýnum karakter. Þar lýsti hann m.a. þeim aðferðum sem hann notar og árangrinum sem hann hefur náð í tengslum við að efla áhuga og sjálfstraust barna.
